Intelectual ou político

O de militante político -cun predominio da acción política como obxectivo permanente e apremiante- vivino na clandestinidade. Daquela había que facelo, porque había pouca xente disposta a correr riscos, e uns cantos que tiñamos conciencia do noso deber, de reivindicar os dereitos de Galicia, que estaban unidos á democracia, asumímolos… Nesa etapa si que tiña unha actividade, unha actitude e unha conciencia de responsabilidade política permanente.

Pero fóra desa etapa, teño ideais políticos pero non militancia política. É dicir: A visión política téñoa en canto a unha idea de Galicia, e un ideal ao servizo de Galicia, pero non unha militancia belixerante, por exemplo partidista; unha militancia de confrontación.

O exilio interior sería unha propensión temporalmente miña: refuxiarme no mundo interior e na filosofía, porque xa se me espertara a vocación.